حسن

فتحت عينى في يوم جديد ...زي ال قبله مفهوش جديد
وسمعت صوت أمي بتنده ..قومي يابنتي ماتأخريش
قومي النهارده يوم الخميس
مش فاهمه حاجة ؟ هقوم لفين ، ماله الخميس
ولقيتها جاية تقولي ياله رايحين زيارة
هنزور حسن ......................
في ثانية هجهز وروح معاكوا .........
ولقيتني عماله زي العيال
شويه أغني ..هنزو حسن ...هنشوف حسن
وأرجع أغني ..سونه ياسونسن أنا جايه هوه
وفي الطريق أعدت أفكر هقوله أيه؟
هحكيلوا عن شغلي وعن قلبي !
وعن أنه وحشني
وأني بقالي فوق السنه مستنياه ...الباب يخبط أفتكره هوه
أسمع أدان أقول ده هوه!
وساعات كمان ..بنسى يابابا وأنده عليك
أيوه هقوله .............
مستنياه وحضني فاضي
مش عارفه أنسى وأعتبره ماضي
وسمعت صوت ...بيقولي ياله ..هنا وصلنا
ولقيتني بسأل
هنا حسن ؟!
طيب هو فين ؟
تحتك هنا
وافقه عليه وهو تحتي
حبة تراب .............
راح فين حسن ؟
دخل علينا مقرأ بدقن ينده يقول
وحدووووووووه
أنت ياعم تعرف حسن ؟
أيوه يابنتي تحتك هنا ..مدفون هنا ..مات من يجي سنة
حالنا وحال الدنيا دايما كده !
أنا مالي أنا ..أنا عاوزة أبويا
هارجع لبيتنا ..وأستنى يجي
أكيد هقابله وأكيد هقوله كلامي كله
ورجعت أغني
حسن هايجي...بكره هايجي